رسالة إلى الإخوان

اتنططوا واتشقلطوا واتشقلبوا في الجو

لا يهمنا التنطيط ولا حتى صوت العو

الشعب ده طيب لكن ماهووش خواف

فان كنتوا فاكرين اننا ح نخاف..هأأو

فأتنططوا واتشقلطوا واتشقلبوا في الجو

أتنططوا واتشقلطوا وشمروا كمامكمو

قولوا جهاد لله قولوا شريعة ودين

دوسوا على الناس لأجل حكامكو

واخلصوا مننا وهجروا التانيين

كونوا عبيد السمع والطاعة

وأعثوا فسادا في الارض ونطاعة

مهما اختفيتوا في حزب وجماعة

بكرة الحقيقة تنكشف في الضو

فأتنططوا واتشقلطوا واتشقلبوا في الجو

اتنططوا واخلعوا دقنكو العيرة

واحكوا لولادكو عن ايات النصر

واتبحبحوا وحاولوا ما تجيبو ولا سيرة 

عن انجازاتكم واللي يٌتم مصر

وابنوا جدار العزل والفرقة

قيموا المشانق للي قال لأ

وهاتوا شعار الشرع في الزنقة

تلقوا الكلام في حضرته يحلو

فأتنططوا واتشقلطوا واتشقلبوا في الجو

اتنططوا واتشقلطوا وكلها حبة

والفجر يطلع والضلام ينزاح

وكبيركم المرعوش مهما يتخبى

ح نزفوا على كارو ونجدد الافراح 

سيبكوا من الشعارات القصد في الكرسي

80 سنة عشرة حتى اسألوا مرسي

حتى اليهود سلموا واستوعبوا درسي

اللي يصون مصري فوق في السما يعلو 

فأتنططوا واتشقلطوا واتشقلبوا في الجو

 يونية 2013

ماعدتش الكلام بحساب

ماعدناش نقبل نخاف  ماعدتش الكلام بحساب

علمونا ف الثورة    ان الأمل له باب

يا تمد ايدك تفتحه    يا تزحزحه حبة

يمكن يفوت الأمل    ويجمع الأحباب

علمونا ف المسيرة إن الهتاف واصل

مهما يعلو السور الشعب متواصل

يا مسجونين ف القصور احنا اللي ساجنينكم

واحنا اللي ح ندينكم وكل شيئ بحساب

علمونا في المدرسة نرسم في بابك حرس

وف حضن ميادينك نفطر آذان وجرس

واللي يشوف ناسك من قهرته يتفرس

وامام عظمتك ينحني بمنتهى الإعجاب

ما عدتش فيه عندي غير إني أعيش ليكي

ازرع ف حضنك ورد وبشهده اسقيكي

و اشيل سواد القلم والحزن ف عنيكي

تطرح عيونك امل ويطمن الأحباب

ماعدتش نقبل نخاف ماعدتش الكلام بحساب

 - 27 يوليو 2013

هي

هي تلك الطفلة بل أكثر تمشي في ثقة لا تٌكسر
هي قصة عمري وأيامٍ ليست بالحلوة بل أكثر
تنبت بسامات فتغطي اشواك الدنيا فلا تظهر
وعبير هواها يؤثرني أتحصن فيه فلا أأسر
لو أملك أن اكتب عنها سنوات العمر فلا أقدر
 تسالني ان كنت متيم بل عاشق بل قيس وعنتر

فخيالي لا يجد حدوداً للوصف ولا يخفظ شعراً

فهي تملك كل الدنيا وفي يدها الدنيا لا تذكر

قد قالوا عنها معجزة وأنا ازعم أكثر أكثر

ان شئت فقل هي مملكة وبحور من حلو السكر

تملك عينان لو فاضت بالعشق كالخمر فيسكر

وعبيراً من طيب يندر أن تجده أو أن يتكرر

وحنان ان ملئ الدنيا تتلون باللون الاخضر

فهنيئا للكون ميلادك وهنيئا لي أكثر أكثر



حبة هدووء نهدى ونفوق
سايق عليك الوطن
حس الوطن مخنوق
سايق عليك الشوارع
وريحة الحلم اللي ضايع
وحضن الدفى اللي سايع
وقت الغروب والشروق
سايق عليك الحواري متعطرة بالفل
وبيوت على صغرها بتلم شمل الكل
وليالي متزوقة فيها القمر بيطل
... بتزف غناويها عاشق على معشوق
سايق عليك الوطن خللي الوطن يقوى
مش وقت مين ابتدى ولا وقت مين أقوى
ده وقت كل الايدين يتجمعوا عزوة
ويصبوا حلو الامل تسري الحياه ف العروق
سايق عليك الوطن
حس الوطن مخنوق

وليد شلبي يوليو 2012

خواطر

مالناش مكان على ارض ناسها بلا تمن

الاخ يقتل اخوه ولا عادش في مؤتمن

لا تقولي مجلس ولا ثورة ولا دياوله

احنا اللي فينا العبر ملعون ابوه ده زمن



الفساد

شال الفساد انشبك والخيط سحب وانكَر

عقدة ورا عقدة وراح ينكشف السر

أصل اللي شافوا الشال واعر وبيشيَب

ثلاثين سنة ملبوس لازم يدوب ويهر

*****************************

شال الفساد غطى م العزوة لأكبر راس

واللي يعوزه البيت يحرم أكيد ع الناس

وان حد قال مش كده يتربسوه بترباس

بالاختصار ضلمة والحال ماكنش يسر

*****************************

شال الفساد الوزير علا اللي فوق أكتر

هبشة ورا هبشة والناس بتستكتر

يعني الوزير كخة ما تسيبوا ياكل عيش

لازم يشيل اللي فوق ح يعمل ايه مضطر

*****************************

وعشان يعيش اللي فوق ويا الوزير مبسوط

نشروا كلاب العسس وحاوطوا كل البيوت

قال ايه خطر ع البلد طب هي فين البلد

سيبتوا الجرادع الغيطان  لما الخضار اصفر

*****************************

نصيحة من مظلوم شاف العذاب والمر

يا من ح تيجي فوق .. الشعب أصبح حر

فبلاش تغرك حياتك وارفع سيوف الحق

الشعب زي الجمل ما تخليهوش يجتر



محمد محى - صدقتني www.annttube.com

خواطر

رأيتها وقد كنت اتفادى اللقاء وأبحث عن ما يشغلني عنها فرغم كل هذه السنين وشوقي الذي احتار في وفي اصراري على أن أخفي معالمها...رأيتها رغماً عن أنفي وأنف اصراري ومكري ودهائي...وعندها قررت ولأول مرة أتخلى فيها عن قوتي..قررت أن اترك لها العنان وأتركني دون اتزان ويا روعة الاحساس هذا...ويا روعة سحر المكان....

لا اذكر كيف البداية ولا معي اصل الرواية..كل ما اذكره اني كنت ملك كل الحكايا ....ها هو ذا أول لقاء وهذه بعض الشقاء وتلك فيها كنت أحبو وعندها عرفت البكاء.....وهذه كم ذوبت عشقاً في عيون قلبي هواها واتخذها للحب درباً لم يكن يرجو سواها....وهذه قدر تحكم وهذه حزن وآاهة.....هذا ما كنت اخشاه أن اترك نفسي لها وبعدها لا اجد غير اني أخبأها مرة ثانية وأحاول ان اعيش بعيداً عنها...............

اتدرون من كنت اتحدث عنها........ذكريات في صور..............من خواطر اسكندراني

خواطر

ماعنديش اي فكرة

عن ايه مخبي وجاي بكرة

ماعنديش اي فكرة

غير اني مش ح أسمح أكون في عنيكي ذكرى

بلاش نضيع عمرنا في هجر وعذاب

مش باقي شيئ من عمرنا بعد الغياب

ما اعرفش ايه حتى الجواب

ماعنديش اي فكرة